شحال ݣدك!
(زجل مغربي)
شحال ݣدك ما تصبر وتساعد
والناس دايخة ولعقول تالفة
شي تلقاه على حالو مبوق
ولاخر بفعايلو كيبان احمق
شحال ݣدك ما تنهي وتشكي
تصبح ذاك لمكروه والمنسي
لا حيلة من غير تنساحب
تبعد كثير.. ولا ترجع وتقرب
اكْثَرْ الظلم والأنانية فزمانا
والكل حامل معاه عقد كثيرة
كانت غير مدرݣة ومخبية
واد هايج حامل غير بالغبينة
لا مسؤول عاد سليم وشريف
ولا جار أصبح كريم ولطيف
غير الكره والبغض والتْمَكْرِيهْ
وكلام التْزَنْدِيقْ وخَرْجَانْ الطريق
تَبْدَالْ لَوْكَرْ أصْبَحْ اليوم ملزوم
وعَاشَرْ مُولْ النِّيَة والمعقول
سَوَّلْ عَلْ الجار نوصيك اليوم
قبل من الدار يا ذاك المضيوم
الناس تسرق وتغش وتنافق
تسمع لكلامهم فالدين تتضايق
ديما على لسانهم غير تخريجة
كتْشَرَّعْ فْعَايَلْ محرمة وخبيثة
-بقلم: محمد دومو
-مراكش/ المغرب
ليست هناك تعليقات:
إرسال تعليق