.
..........((( من بعدك يا أبا ))) .............
من بعدك يا أبا
وانا شايف الدنيا ضباب
والدنيا اسودت ف عيوني
وايامنا صبحت سوده هباب
واللحمه بقت بالنسبه لنا
حلم و محتاجه لعلي بابا
من بعدك يا أبا
اخدتنا التوهه من الاحباب
والكل أتفرق
والكل أهو خاب
ولا عاد في سؤال
ولا حتي جواب
من بعدك يا أبا
مابقاش في أحباب
والناس الحلوه سبقتنا
وقلوب العشاق هجرتنا
و لا عاد في حب يجمعنا
ولا عادت تاني لمتنا
ياخسارة الصحبه اللي سابتنا
يا خسارة الناس
اللي سابتنا واقفين ع الباب
ياخسارة الايام الحلوه
بكفايه عتاب
من بعدك يا أبا ياحنين
وحشتنا اللمه والسهره
وحكاوي ابو زيد أو عنتر
و كلامك وانت بتقهقه
والضحك ب يعلي ويسمع
والناس في الحاره بتتمتع
وألفرحه جوه قلوبنا طوفان
ومقامك يعلي وسطينا
ودموع الفرحه تغطينا
من بعدك يا أبا
خلاص تهنا ونسينا
و الشمس غابت حوالينا
ودفاها راح من وسطينا
وعمود الخيمه اللي حمينا
اتهد وهد الكون من حوالينا
من بعد يا أبا ما عدش أمان
ولا عادش حنان
و قلوبنا صبحت مقبوضه
والخوف محاوطها من بكره
وخلاص عايشين علي ذكري
ايامنا هناك ايامنا معاك
وبساطة روحك تدبيرك
والحكومه اللي ف تفكيرك
كل ده أهو غاب وبقينا أغراب
من بعدك ياأبا
رامتنا الدنيا علي الهامش
وبقينا أغراب
حتي الاخوات مابقتش أخوات
و لا واحد يسأل ع التاني
غير في الاحزان أو في الأفراح
والدنيا صبحت كدابه
مليانه غش علي خيانه
علي زيف و خداع
و الصدق اتحول في زمانا
لرياء و نفاق
من بعدك يا أبا خلاص ضاعت
حتي الاخلاق
ولا عاد في حق ولا واجب
عايشين في صداع
و حفاة ايامك والله
صبحم أسياد
و الحقد أهو زاد
من بعدك يا أبا
خلاص غابت كل الاوضاع
و الوضع القائم دلوقت
للي معاه ريالات و دولار
أو قوه غاشمه جباره
أو فرد دراع
و أهو كل القيم الموروثه
ضياع في ضياع
من بعدك يا أبا
خلاص ضعنا و بكره هنتباع
و الفرقه حطت فيمابنا
وبقينا شيع
ولجان ترفيه في السعوديه
و الأمه جياع
من بعدك يا أبا
خلاص ماتت فينا النخوه
والشهوه بتحكم في الأتباع
ولا عاد في رحمه ولا مرؤه
ولا عاد في سماح
والحقد أهو عشش ف الدنيا
والحسد أهو زاع
وخلاص الآخره بتقرب
ونهاية العالم بقت أقرب
من آي زمان
كلمات الاديب الشاعر.د/السيد علي القن
ليست هناك تعليقات:
إرسال تعليق