وشِّكْ أوّل قطفة... شعر رفعت المرصفى
----------
وِشِّكْ ...
طبق القشطه المخلوط بالشهدْ
لكنْ عُمرى مـ باشبعْ منُّه
واللِّ بـ احِس براحه كبيره كبيره
لمّا عينيه تضُمُّهْ
وِشِّكْ ... حلم الشُّعرا فـ ليلة عيدْ
حلم الفُقرا فـ ليلة بردْ
حلم الفقرا لمّا تغنى أو تتمنى ْ
وشكْ ... أول قطفه من تفاح الجنه
وشكْ حاضن كل معانى الخير...
زىّْ ملاك ساكن عـ الأرضْ
كل ملامحكْ بدويهْ صحيح / لكن لونها ...
زىّ الدهب الصافى المعجون بالوردْ
واللاّ خدودكْ,, ,
لمّا بتغمزْ وىَّ الضحكة فـ لحظة وِدْ
والغمازه اللى بتتشاقى فوق الخد
واللِّ تملّى باجـرى عليهم
لما بيجرى ورايا الصّهدْ
واللَّ عنيكى ... لما بـ اشوفهم
باشعُر إنى بـ اطير وبـ اطير
باشعُر إنى ساكن فيهم زىّ الطيرْ
باشعر إنى جُوّا عنيكى بـانام واتمَدْ
وِشكْ ... أجمل عالم شُفته بجدْ
ليست هناك تعليقات:
إرسال تعليق