طعم الوجع / بقلم الشاعر / عماد الدين العيطة

... طعم الوجع ...

...    أشعار    ...

عمادالدين العيطة 

لما تحب مرة تفرح ..

وتغمض عيونك وتسرح 

وتعيش وتحلم بالحبايب

اللى راجع م السفر

مشتاق إليك .. 

واللى صاحب السهر

عشان قلقان عليك

واللى يتمنى فرحته 

تسكن عينيك 

وأنت قلبك برئ

دايما مضئ بحبهم

وبتحبهم .. وبتزرع لهم

من حر الأمانى شجر

وفجأة .. ينزل مطر

تفتح عينيك على صاعقة 

نازلة م السما ..

سايبة وراها السواد 

كأن نهار البلاد ..

صابه العمى .. 

 وحلمك ياعينى إتنسى

واللى باقى هو الظلام 

وجرح وألام .. حتى القمر

فجأة إختفى 

ويااااه .. ياه .. ع الوجع 

وأه على قلب إتخدع ..

قلب إتوجع .. م الظروف  

من ليل وخوف

من جراح اللى بيقول ..

عنهم حبايبه .. حتى قرايبه 

خانونه وباعوه 

حتى اللى باقى لسه جنبه

بالشماته بيطعنوه

وبيسألوه .. لو عاوز تعيش؟ 

أمان مفيش .. فرح مفيش

ومهما تصرخ تستغيث ..

هيرجع صراخك بالوجع 

ولازم تدوق طعم الوجع

هو دا .. طعم الوجع

طعم الهوايل والورع

ورحمة من قلوبنا بتتنزع

وطعنة فى حضن الجدع

هو دا .. طعم الوجع

 طعمه باقى ف  قلب الوديع

على لسان الرضيع ..

 اللى قلبه بيتوجع ..

 وحضن أمه من ..

بين إيديه عمال يضيع 

والحنان وهم وخدع

هو دا .. طعم الوجع