{{ رسالتي من تحت المركب }}
""""""""""""""""""""""""""""""""""
لما سكني الحزن كتير
وتأكدت مفيش تغيير
أن الأزمة مالها حلول
وإن الشعب لفقره أسير
والعيشة مرة مافيها مسره
قلت أهاجر واطلع بره
أنسي مذلة وانسي مضرة
قلت اروح للحاج سمير
قاللي فلوسك قبل الرحلة
تلاتين ألف لتذكرة واحدة
اتاريني بغرس رجلي بوحلة
وبرسم موتي بالطباشير
قلت لنفسي بدمع العين
هي دي موته ولا اتنين
متفكرشي!! متكسلشي !!
دي الناس واقفة بالطوابير
عايزة تهاجر مش لاقيين
قمت بسرعة دفعت فلوسي
قاللي معادك يوم الاتنين
و بمحفظتي شايل صورتين
إبني وبنتي نور العين
وأمي دموعها نازلة بكترة
ما تنشفها يا ناس بشاكير
وأم أولادي تقولي كفاية
أنت حياتي أنت سمايا
انهي الغربة بحق رجايا
وانسي الدنيا وكن ويايا
قلت أنا قاصد رب كبير
وتوكلت عليه في المغرب
شايل همي وراكب مركب
ظلمات ليل وظلمات بحر
زي بعضها كله بيرعب
وجواز سفري بدون تآشير
بكتب حزني بدموع دامية
وموج البحر شاهد ودليل
ناسي كل أحلامي السامية
عايش أيامي سفر ورحيل
وفجأة جاءتنا رياح أعاصير
وصار الموت يصارع فينا
وموج البحر بيغدر بينا
نسينا ساعتها كل أمانينا
ندعي نقول ربي ينجينا
وخلاص موتنا صبح أساطير
وأحزان عمري أبلغ تعابير
ولسه تقولوا الدنيا بخير .؟؟؟
والله أنا شايف حالكم غير ..
سرقة ونهب وموت لضمير
بعد الظلم وقتل الحلم
مين هيقولي فين التباشير
■□■□■□■□□■□■□■□■□■□■□■□■□□□■
▪▪▪{{ كلمات وأحزان :أ/ محمد عباس }}▪▪▪
□■□■□■□■□■□■□■□■□■□■□■□■□■□■
ليست هناك تعليقات:
إرسال تعليق