**رباعيّات
1 - واقف فى وسط الطريق ' مستنّى يطلع قمر ..
يصبح النّور صديق ' لو الظلام ....غمر ..
ورا كل خطوة سقوط' ورا كل همسة سكوت ..
ولما الفجر شقشق ' بدأ حفل السمر .......
2 - وقّفت قلبى , ويا القلوب صف ..
طابور عرض لجل الجميل يتعرّف .
شاور على قلبى وبص لى وقال لى :
عجبنى قلبك وهاخده' لجل اركنه ع الرّف .!
3 - أنا كل امّا اقول له نتقابل يقول لى بكرة ..
أقول له انا قلبي مشّحتف لمجرّد الفكرة ..
يقول لى آسف ' أصلى مشغول النّهاردة ..
ولمّا ييجى الغد ..... يبقى اللّقا ذكرى .....
4 - حاولت احبّك من زمان بس مقدرتش ..
وخفت ابوح لك بسرّى' مش بعيد تفتش .
ما انا أصلى عارف لسانك' عمره ما يبطّل .
غلبت أقول لك ما تسكت وانت ما سكتّش .
5 - هالاقيها من ظلمك, ولّا من جرحك, ولّا شيل الهمّ .
كل أعذارك , وحججك ' حفظتها صمّ .
من النّهاردة ' خلاص مفيش كلام بينّنا ..
متورّينيش وشّك , وخلّى عندك .... دمّ .
صبري على
ليست هناك تعليقات:
إرسال تعليق