؛؛؛ عطش السنين ؛؛؛
؛؛؛؛ أشعار ؛؛؛؛
" عمادالدين العيطة "
ياقلبى .. ياحاضن دموعى
ياقلبى .. يا .. صابر عليا
كنت فاكر الدنيا ديا ..
والهنا .. دول .. بتوعى
كنت فاكر الفرح ليا
مكنتش أعرف هيجى يوم
تسكن الأحزان ضلوعى
ولاكنت أصدق إن الهموم
هتيجى يوم تطفى ..
فى الأفراح شموعى
حتى وردة ربيعى
دبلت ف إيدى حبة حبة
شوكها بس باقى بين إيديا
والربيع راح وإستخبى
ولاحتى ..سلم عليا
إنت بس ياقلبى ..
اللى باقى بتواسينى
أخدت الدموع من عنيه
لكن لسة جوايا حسرة
بتنادينى .. شاهدة عليا
ياقلبى يا عطشان حنين
من سنين .. والسنين
مافيهاش حنين
تصرخ وتنده ع السنين
ومين يسمعك
تنده وفاكر .. زمان الفرح
تانى هيرجعك ..
لا ياقلبى .. دا اللى باقى
م السنين غدر السنين
تنده وتنده وتقول يامين
تلقى الأنين حالف يمين ..
يجرحك .. ويوجعك
ياقلبى يا .. كاتم أهات
وفيك كل الأحزان تبات
عامل كبير .. وإنت ..
نبضك من حرير ..
وقطعه غدر الزمان
ومن زمان وإنت ف سكات
ليه ياقلبى ع المر صابر
ولحد إمتى هتفضل تكابر
وإنت عارف حكم القدر ..
علينا قادر .. واللى هاجر
أخد معاه عمرنا .. خد صبرنا
سافر معاه ضحكنا ..
والفرح مات .. زى النبات
لما يموت فى ..
أرض عطشانة مطر
ليست هناك تعليقات:
إرسال تعليق