حكاية ترميني لحكاية!
(زجل مغربي)
تصدمت كثير فناس
والحيرة سكنات فالراس
مع الصديق كيف مع لخوت
آش المعمول اليوم
اصبحت بينهم غريب ومجهول
حكاية ترميني لحكاية
ضاعت ومشات كل أيامي
ما تعلمت من الدنيا شي
ولا فهمت لمعاني
غشيم بين كثرة الدياب
عايش فلوساط كنعاني
الشمتة ديما ملازماني
من لقريب ولحبيب
قبل من ذاك لبعيد ولبراني
الصدق فالدين قيمة
وصا عليها الله العالي
شلا من وشامات فݣلبي
جروح بارزة مألماني
ما نشوف النعاس بوجيعها
والعين تبكي طول الليالي
وصاية الدين باينة ف فعالي
قبل من وصاية لي رباني
ما نعمل الشر مع الغير
وما نكون على راسي جاني
الحق اصبح صعيب ليوم
والناس بحالي كثيرة تعاني
والغشاش.. وذاك الخداع
تلقاه عايش فحياتو هاني
دفنو الأخلاق والقيم
ونساو الشق الصحيح فالدين
من سلوك ومعاملات
تلقا الكل مكتافي ومشطون
غير بالصلى والصوم
والباقي ما بيها ثاني ملزوم
آش من دين صنعوا اليوم
آش من دين بلا قيم يكون
صبحات الناس فراسها تنافق
قبل من الغير و على الصف تتسابق
والله مطالع عل لمدرݣ والمخفي
لا حيلة غادي تنفعهم مع العالي
-بقلم: محمد دومو
-مراكش/ المغرب
ليست هناك تعليقات:
إرسال تعليق