نفرغ هم الݣلب بحروف
(زجل مغربي)
من كل حكاية ننضم قصيدة
بالهموم و بالعذاب مختازلة
حتى يقيسني مزيان
يخرج إحساس من لداخل
يتدفق بحال لعيون لي تسيل
شاقة طريقها فالشعاب
تجمع مياه جارية فالواد
تنفع لبهايم ولفلاحة ولعباد
نفرغ هم الݣلب بحروف
نداوي بها كل الجروح
هو بوح شافي ومعنى
ما نخليه ف لداخل ساكن
هاذي حكايتي مع لقصايد
هكذا نسرح ف لعلالي
ونتخلص من لمصايب
نكتب ومحكوم بالنضيم
وبين الناس نضحك ونواصل
ما نعير لكلام الغير
ولا يطيح عليا الضيم
الصمت حكمة من فعالي
ولكلام تلقاه منضوم حروف
يسافر بذاك اللبيب لفهيم
لي من طينة لشراف لحرار
لي بالغمزة يفهم لكلام ولمعاني
-بقلم: محمد دومو
ليست هناك تعليقات:
إرسال تعليق