بعد أبوك
بعد أبوك ما مات يابنتي
عايزه أقولك كلمتين
حسه كان في الدنيا عندي
دخلته بالليل عليا
أغلي من نور العينين
بعد أبوك ما مات يابنتي
كل شئ أصبح حزين
الهدوم اللي في دولابه
لسه ليه مشتاقين
والمداس اللي سابه
سامعه صوته و الأنين
وإلا صوته و هوه راجع
فيه دفا و فيه حنين
شخطته في البيت مهابة
أو أمان للخائفين
أما خوفه ع الحبايب
هوه ده الأب الأمين
لسه روحه بينا عايشة
واخدة حس المحرومين
لسه حنية أيده
ع الغلابة و اليتامي المساكين
ياه يابنتي
بعد أبوك إيه فاضل لي
غير سيرة الطيبين
لما مات أبوك ساب لي
سيرة حلوة للسنين
لأجل خاطر كان ضميره
في الحقوق حارس أمين
لسه بين الناس شهامته
تحكي أنه كان آمين
في الأمور أحكامه نافذة
حكمه بالحق المبين
كل حاجة فيها خبرة
لأجل بارع أو فطين
بعد أبوك ما مات يابنتي
كل شئ أصبح حزين
الحيطان عليه بتبكي
و أسالي سورة ياسين
لما كان يرجع لي بدري
كان يصلي ركعتين
كان بيختم في الكتاب
مرة كل جمعتين
ألف رحمة ونور ياغالي
توصلك في العالمين
بعد أبوك ما مات يابنتي
جف دمع كل عين
حتي راحة البال سابتني
ما ادري راحت مني فين
والكلام الحلو بينا
لسه شايلاه في العيون
بعد أبوك ما مات يابنتي
ليكي عندي ميت وصية
منها تفتكريه ف دعاك
أو تربي أبنك ضناك
زي جده اللي عطاك
كل حاجه في صباك
اللي لولاه ما كنت
واللي اسمه لسه باقي
إللي كان في حبه راقي
وعمره ما اتغير يومين
كان تملي قلبه طيب
ويا كل الناس أصيل
بعد أبوك ما مات يابنتي
الحنان في الدنيا فين
خد معاه كل حاجة
واحنا بعده محرومين
بعد أبوك ما مات يابنتي
لسه ليه مشتاقين
لسه فينا قلوب بتبكي
ع الليالي و ع السنين
ده اللي كان حامينا هون
واللي كان جامعنا فين
بعد أبوك ما مات يابنتي
فرقت بينا الليالي
وغيرت فينا السنين
كل واحد راح في حته
واختفي الود القديم
بعد أبوك ما مات يابنتي
نشتكي طيب لمين
غير لوجه الله تعالى
هو رب العالمين
هو رب المظلومين
ألف رحمة ونور يا غالي
وفي دعانا نقول آمين
يرزقك بالجنة يابا
ده جزاء الصابرين
كلمات الاديب الشاعر السيد علي القن
ليست هناك تعليقات:
إرسال تعليق