براد أتاي مع الكاس
(زجل مغربي)
راه البراد تشحر وطاب
يا مجمع لحباب والصحاب
براد اتاي مع الكاس
عليه يتجمع خيرة الناس
تلقاه فوق السنيية بارز
والكاس بلهفة مولاه
يتسناه يعمر ويعاود
والساقي يتفنن فالكبان
يقلب ويشقلب فالكيسان
ويعاود لقليب بالتمام
هكذا كان وباقي من زمان
تعلام خويان اتاي فالكيسان
الرزة لازم تكون باينة
ظاهرة فوق الكاس ال لعيان
كشكوشة بيضا ناصعة
الكل ساير بلقوام والتمام
وتكون لقصارة يا سلام
محلاها ݣلسة ونزاهة
حكايات كثيرة ومتنوعة
تنسيك هموم الزمان والدنيا
ويتفاجى الراس من الغمة
وملي تحلى الݣلسة وتزيان
يكثر لحديث لمليح ولفراجة
وتعود التقنيسة فالشريب لازمة
كل ݣالس يتقونس باتاي
وتكون الرنة مسموعة ومنغومة
تزين ݣلسة لحديث
ويحلى بها لكلام
حكاية اتاي صنعة من زمان
حكاية ترميك لحكاية
نتذكر بها ݣلسة لعناية
لي ما بقى ليوم بحالها
من غير الجرى الخاوي والزربة
والشطنة بلا قياس
مع وجيع الراس
-بقلم: محمد دومو
-مراكش/ المغرب
ليست هناك تعليقات:
إرسال تعليق