نطق زمان البارح
(زجل مغربي)
نطق زمان البارح
يخاطب حال ليوم
يتساءل عل لحوال:
آش جرى ليك
ملي خويت لمكان؟!
ومشات وسلات أيامي!
ما شفت ما ريت
بحال لي أنت فيه اليوم
كتمحن مسكين وتعاني
فين تاهت بيك ليام
حتى تلفوا ناسك وأنت كتشوف
تتسناهم وملهوف
يرجعوا عاود ثاني
سمع مني لكلام:
لي مشى.. مشى..
ولي تاه.. تاه..وافنى
ما يرجع ولا يتسݣم
هكذا كنعرف الناس من زمان
وبلا ما تعيا من التخمام
ولا تسنى فلعيان
هذا حال الناس
وبحال وقت البارح
بحال وقت اليوم بالتمام
راه الفرق كاين بين لعيان
الفرق فلعقل لي كان
ولي تغير واصبح كاين
البارح كان يميز ويختار
بالحشمة والاحترام والإيمان
وبالاخلاق والقيم
ومن ليوم نوصيك يا هاذ الحال
لا تسنى منهم شاي
قربات ساعتهم ويفناو
والزمان كيبقى غير زمان
وبحالي بحالك بالكمال والتمام
-بقلم: محمد دومو
-مراكش/ المغرب
ليست هناك تعليقات:
إرسال تعليق