البراد واجد
(زجل مغربي)
راه أتاي واجد ومشحر!
والبراد حاضر ال الخويان
دالح فلعلالي وحدي ونخمم
فين ݣلسة لفراجة؟!
فين غابت النكتة ولقصارة؟!
غير أنا والبراد دابا!
شوف فيا..نشوف فيك..
هو ما يخوي تݣول مقلق
وأنا مسوخر ما باغي نتذوق
فين غابو ذوك لحباب والصحاب؟!
فين مشاو لخوت ذوك لقراب؟!
راه أتاي ما يحلى ولا يروق!
إلا مع لحديث والجماعة
فين مشاو مجمع لحباب؟!
علاش صبحات ليام كلها عذاب؟!
ودلحات بيا من غير سباب!
فين تفرقات الجماعة؟!
وعلاش كثر ليوم تسوالي؟!
إيه على ذاك الزمان الغالي!
راه السينية جمعاتنا
وراها حكاية ومعاني
وعلى خير لعباد ورثناها
كلها نزاهة والنشاط جالي
جمعات ناس بلمحبة ولعناية
والتقنيسة لازمة وديما حاضرة
لا فرق بين هذا وذاك
تذوق وعير لكلام..وعبر
ولكلامك كلشي يتمعن ويسمع
الذوق فالمعنى قبل لكلام
ولحديث مع السينية يكون بلقوام
هكذا سمعنا!!
هكذا عرفنا جميع لمعاني!!
هكذا كلامنا تفنان كان ساري!!
-بقلم: محمد دومو
-مراكش/ المغرب
ليست هناك تعليقات:
إرسال تعليق