هموم زوجة مصرية
ياللي مليت البيت حنية
ليه السحنة ياسيدي ملوية
اعمل خضار من غير لحمة
تزعل وتزع كمان فيه
واليوم اللي بعمل فيه كشري
بتطلع هم النفخة عليه
غلبت ياناس ازاي ارضيه
طالب فراخ مع ملوخية
والفراخ سايقة ف دلالها
وعمللها هيبة وشخصية
اجيب منين يابو العيال
الفرخة فوق المية بشوية
ومفيش غير كام فص توم
وجزر وحبة طماطم مهرية
وتلاجة بتبكي على ذكريات
فيها كانت بالاصناف معبية
وللي معايا يدوب يكفي
شوية فول على طعمية
الغلا سايق في العناد
والعباد شايله الهموم ومكوية
والبيت فاضي وانت القاضي
مالكش حق ف لومك ليه
احمد واشكر ع اللي في ايدك
بركة ربك لقمة هنية
شعر سامي كرم
ليست هناك تعليقات:
إرسال تعليق